自家煮 - 玫瑰露煮大蜆

今晚決定在家煮飯仔…
放工後去街市買餸！
想煮一餐較為日式少少既晚餐…

心血來潮想試下整清酒煮花甲…
既然想就要去實行啦…
不過去到海鮮檔…啲花甲已售罄！
唯有就改為買大蜆！
最多咪變成清酒煮大蜆…
之但係屋企又沒有清酒…
就試下用玫瑰露啦！
醉既酒料理我就最鐘意玫瑰露…因為夠香！
就係咁…左改右改就由清酒煮花甲改為玫瑰露煮大蜆！
第一次試煮比我想像中簡單！
原來真係唔難架…

玫瑰露煮大蜆

材料：大蜆一斤
            蒜蓉泥
            葱
            清雞湯 250ml
            玫瑰露 適量

將大蜆洗乾淨再開一盤清水加少少鹽浸佢地半粒鐘左右…俾佢地吐沙！
然後將蒜蓉泥同葱爆一爆…加入大蜆再落清雞湯！(因為清雞湯比較咸所以我加左啲水)
中火煮到大蜆開口就熄火加少少玫瑰露蓋住焗兩分鐘左右…完成！
 
玫瑰露酒味重所以我加左我認為適當既份量！
以免酒味過重蓋過大蜆既鮮味！
不過真係極香…
同埋我覺得原來用玫瑰露都好好味…比清酒更惹味…
相信加埋洋葱索埋啲汁應該仲正！

開餐喇！