大年初一

恭喜發財！身體健康～萬事如意～心想事成～四季平安！


大年初一
10:00起床準備梳洗後回HusB家拜年！
因為兩位小朋友喜歡BUZZ LIGHT YEAR ＆W00DY～
早前已特地去買了T0Y ST0RY利是封！
哈哈～他們果然是很喜歡呀！
拎住封利是都可以玩好耐好開心呢！

由於昨晚差不多4:00才睡～今早又早起⋯
所以都比較累～
約三時左右就回家小睡～
等到6:00出門口出發去香港仔跟嫲嫲團拜！
年初一酒樓好爆場～
上菜都上到亂晒～
食完就回家了！

打算開隻婚禮DVD看～
點知⋯個CD－R0M L0AD唔到碟！
新買架喎～
唔係咁快就壞左呀？

年三十

年三十港股得半日市⋯
個心早就已經準備放假了
不過因為仲有日股⋯
所以都等到2:00先收工！

收爐後回家煎蘿蔔糕當午餐！
第一次煎糕！好在無煎到變非洲蘿蔔糕～
真係好味呀！


RUBI今日四點收工來我家拜個早年～
買左份靚靚禮物來！

在家吹水食蛋糕～
等HusB放工出發到錦繡跟家人食團年飯～

今晚行程好豐富～
先在錦繡食團年飯再回康怡食齋拜早年～

HusB要5:30先收工⋯
然後先一起搭車入元朗！
今日收到婚禮相片同埋影片～
等埋KINS0N個啲就收齊晒喇！
食飽飽約十時左右就搭返車出來～
回娘家倒數跟拜年收壓歲錢！
好開心呀！

仲食埋齋！
之後就緊係欣賞下啲相片！
SNAPSH0T竟然有點驚喜～都影得不錯呢！

超級實惠既實惠餐枱

由於屋企比較細～
所以要找一張比較小型既餐枱！
睇左好多地方…其實都找到合心意的！
尺寸又啱！外型又唔錯！又可以放大枱面！
不過唯一美中不足就係唔包椅子要另外再找～

最後在實惠見到哩張！
價廉物美～（應該說是以哩個價錢來說算是不錯！）
$500有找～
一張枱＋兩張椅子！咁平响邊度找喎！

老實說的確就唔係自己心水～
但價錢真係好抵！

年廿九

返埋聽日就收爐了～
放假既心情好濃厚！
今日帶左蘿白糕做午餐～
最衰無胡椒粉⋯⋯有就更惹味了！

HusB放左工就去左實惠取貨～
而我仍然在公司開會⋯⋯六點半左右完結！
返到屋企～HusB正在裝磡餐枱！
我就去準備晚餐～
今晚好簡單⋯⋯
又係牛肉烏冬⋯⋯再加多幾粒爆醬墨丸！

今次可以在餐枱上晚餐了！

年廿八

太好了～
早前訂既電腦枱及餐枱都能夠趕得切在新年前完成！
明明說好了是3-6送貨～
由於正值上班時間～
所以又勞煩屋企人喇！
往往就係咁架喇！
留在家中等…就永遠都唔會準時送貨！
不在家中時…就會一早送貨！攪到要仆回家簽收！
勁老土！真係好討厭！

至於餐枱方面…今日都打來說有貨了！
我地在實惠買選擇自取！
所以留返明日先去拎！
能夠在新年前完成哩兩件事實在太好了！

年廿七

臨近新年…DADDY & MAMI就會合力一起整蘿白糕！
當然我同RUBI就係負責等食個位！
剛蒸好既蘿白糕～熱辣辣超好吃！
完全地可以當餐食！

今年由DADDY全權負責～
早上八時俾RUBI一個M0RNING CALL…
原來DADDY早就起身刨蘿白絲了…真係辛苦！
蒸幾底糕的確用上大半日時間！
下午MAMI SEND來既相片…

我已經流晒口水了…勁想食呀！
DADDY整左一底俾我～
一底俾HusB屋企～
今年要自己煎糕了！
放工後同埋屋企人一起DINNER！
之後仲去左聰嫂食甜品！

薑汁柚子／荔枝果凍係我既最愛！
次次都係0RDER佢…一點新意都沒有！
但的確好薑好好味！

聽日就送電腦枱黎喇！
趕得切在新年前有得用～真好！
不過送貨時間係下午3-6…
即係又要搵著DADDY & MAMI來攪了…

放血日

今晚相約了日文同學們晚飯～

在THE 0NE 8/F的FULL/HALF！

放左工相埋RUBI一起出發！
在DSF行街街～
護膚品哩樣野真係好難抵得住佢地既誘惑！
自殺式放血行動就咁就展開左喇…
我地真係要好好學習ST0P自己了～
一張臉又點塗到咁多野上去？
不過的確以前在家跟RUBI一起SHARE用…
依家分開了…就要買俾自己用喇！

放完血就去食晚餐！
整體來說哩度既食物都唔錯呀！
我地六個人叫左五個餐～
每一個都好好味…
只係牛扒比較遜色～

開開心心又一個晚上！

我的戰利品！

唔知可以用到幾耐呢？
當然我唔會只顧自己既…
HusB都有架！

年廿六團年飯

做完家務後⋯⋯等埋HusB做完GYM回來白白豬後⋯⋯
就出發返娘家晚飯！

今晚晚餐好特別～
除左冬菇髮菜蠔豉外⋯⋯
其他野都跟以往的好唔同！
有三文魚腩刺身代替蒸斑⋯⋯
仲有煙鴨胸代替雞⋯⋯
又有豉油碟般大晚帶子刺身⋯⋯鮑片生菜再加孖腊腸！

真係勁豐富又好味！
仲開左支紅酒高興一下！
迎接新一年大家都要身體健康！
順便慶祝我地一個月快樂～

食飽飽落左去AE0N行街街辦年貨！
24-27/1又有折扣～好難唔跌錢既！
買左拜年既賀年禮品～
仲買左熱香餅粉⋯⋯廣島蠔⋯⋯
返屋企做定存貨！
又係要想想點樣泡製晚餐了～

結婚一個月 ❤

原來已到26號～
這麼快就一個月了！

早上起床就由我來整早餐慶祝一下！
熱香餅係我多年來最拿手既早餐～

但拿手既事總會有失手既情況！
以往我用過石油氣爐⋯⋯煤氣爐⋯⋯
就從未用過電磁爐 
所以就唔係好識控制個熱度⋯⋯
導致出來既效果比較偏白又或者燶左 
我要好好摸熟個爐～
下次整個完美版本！
雖然個外表就唔係好靚仔～
但仍然都係咁好食～
最重要有人欣賞嘛！

煮早餐既同時HusB負責洗衫換床單！
攪掂好晒就出發去買餐枱！
成功入手了～有了餐枱唔駛再企响度食飯了！
然後回家到我做家務⋯⋯
HusB就去做GYM！
我完全提唔起勁做GYM⋯⋯

農曆新年又到喇！仲有五日就年初一！
以往就只有利是⋯⋯
今年唔同～角色有所改變！
輪到要派利是喇！

趁住星期日得閒啲～
就開工封定啲利是先！

港九新界一日遊

由十二月開始一直都未病癒⋯⋯
今日終於忍唔住要去睇耳鼻喉專科了！
預約左十二點⋯⋯但都要等左成粒鐘先到我看⋯⋯
基本上都沒有大礙⋯⋯
醫生話扁桃腺仲係有點紅腫係慢性喉炎⋯⋯
抵抗力差所以咁耐都好唔返⋯⋯
加上鼻敏感都有影響！
哎⋯⋯我真係好想快點好返呀！

睇完醫生去左大角咀睇下傢俬⋯⋯
因為我地仲有電腦枱同埋餐枱未買！
之後仲去左有名氣既英記油渣面食下午茶！
哩度只有油渣面一樣野食！
所以一坐低店員只會問要大定細！
記憶以來第一次食哩樣野⋯⋯好味！


時間尚早⋯⋯我地去埋荃灣睇枱⋯⋯
最後都買到電腦枱！真係好喇！
但就未知新年前可唔可以送貨～
我部新電腦好需要你架～快啲來呀！

晚上返HusB家晚飯！在巴士上睡著了⋯⋯
唔知點解真係好攰呀！
返到屋企等食飯前仲要小睡片刻⋯⋯
看來我身體狀況真係好差！
要好好操下令自己健康返病痛都少啲！

本來都打算去行花市⋯⋯
但太攰了⋯⋯還是過幾日先去吧！

牛肉烏冬

昨晚在娘家拎左啲物資回家！
有芥蘭⋯⋯牛肉⋯⋯爆醬墨丸⋯⋯仲有烏冬添！
本來打算今晚出街食去行街⋯⋯
不過既然有材料就玩煮飯仔啦！

今日要上CPT六點先放工⋯⋯
所以晚餐由HusB操刀！
等我返到屋企有得好快開餐！

晚餐有芥蘭⋯⋯主菜有牛肉烏冬⋯
再加蛋隻溫泉蛋
賣相都唔錯架！


簡簡單單又一個晚餐⋯⋯
今晚唔駛洗餐矇了⋯⋯

住家飯

今日招呼RUBI來我家晚飯。
昨晚已開始想⋯⋯整咩好呢？
煮飯，蒸腊腸⋯⋯不如就整埋雞翼！
整咩雞翼好呢？煎雞翼？不如加埋蠔油都好喎！

如是者放工後去左SUPERMARKET買冰鮮雞翼同埋蠔油。
返屋企將雞翼解凍。
拎左個MINI電飯煲出來研究點樣煲飯。
洗完米同HusB落去街市買菜同埋魚肉準備另一道餸 ＞＞生菜魚肉

買好晒野返屋企就開始準備喇！
洗菜⋯⋯撻魚肉⋯⋯真係覺得煮餐飯唔係一件易事。
啪著個飯煲煮飯⋯⋯洗乾淨腊腸一陣等收水時掉埋入煲蒸！

同一時間就開始煮餸⋯⋯

蠔油煎雞翼
材料：
雞翼9隻（完全解凍）
蠔油（要溝水加糖）

燒熱鑊落油放入雞翼⋯⋯大火煎完一邊先煎另一邊。
兩邊都煎到金黃色卜卜脆。
就加入蠔油兜一兜⋯⋯直至啲蠔油痴住晒雞翼就完成喇！

嘩⋯⋯人生第一味親自下廚既餸誕生！
真係勁開心呀！
最重要係有讚美呀！

生菜魚肉湯
材料：
鯪魚肉
（平時MAMI會加入蝦干，蔥粒⋯⋯不過我資源有限只係落左胡椒粉同麻油撻到起膠）
生菜（切細片）
薑（刮晒啲皮，切片）

煲滾水落薑片然後落魚肉再慢慢落埋菜⋯⋯一鑊熟！攪掂晒！
下次可以再落埋豆腐粒⋯⋯應該會不錯呢！

今日真係好有成功感呀！
原來我都可以識煮野食架！
雖然係好簡單既菜式⋯⋯但好開心好滿足呢！
我都無想過自己可以成功地整餐飯食⋯⋯
個雞翼我真係覺得好好味呢！
心を込めて作りますからね！

每日一蘋果

我的新蘋果在上星期五已經黎左我家了…
今日麻煩阿哥上來幫我SETUP部機！
放工後一起去電腦城買埋R0UTER & CD-R0M～

我家終於有電腦可以上網喇！太開心了！

之前一直都未用過MAC機～
都有啲擔心識唔識用！但玩玩下就會識架喇～
就當學多樣新野！

不過暫時都未有電腦枱…
只可以用住個櫃仔頂住檔先！
不過IMAC咁慳位都唔成問題既～
有了IMAC可以同DADDY & RUBI 玩FACE TIME了！

寶雲徑

今晚回娘家晚飯…
下午我地決定健康啲～上寶雲道行山！
哩個地點我一點都唔陌生！
因為由細到大都經常性同家人一起行！
以前曾經由灣仔峽道上也曾由萬茂里上…
今次就用最慳力既方法！
到合和中心17/F上～
經過學校回想起牆外四個天使…的確好懷念！
不過用作擴建中學部要拆卸重建！的確無辨法！
在油站對面有斜路上…
好耐都冇行過了！感覺很辛苦呀！
真係一名壞鬼後生…

我地向司徒拔道方向進發…
途中會經過一個著名景點<<姻緣石>>！
我印象中都真係未曾行過上去…因為好多梯級既關係～
今日就上去看看先！

有幾位善信在拜神！
之後繼續行…行…行…
行到盡頭就係司徒拔道！
我地繼續沿住往大坑方向行…經藍塘道去返跑馬地！
嘩～真係行到好攰呀！行左兩個幾鐘！
今日有足夠運動量！

然後搭返叮叮回家準備回娘家晚飯了！

香蒜腸仔炒意粉

早前在蘋果日訂既IMAC終於都出貨了。。。。
星期三送貨。。。因回娘家晚飯不在家。。。。
唯有再相約第二個時間再送貨！！
約左星期五6-10時段。。

HusB約左屋企人一起打邊爐！
今晚RUBI來我家陪我在家一起等。。。。
於是我地決定攪攪新意思！！
一起玩煮飯仔。。。
今次我地決定左要煮意粉。。。
第一次整。。。好緊張又興奮！！
在網上看過食譜。。。
放工後一起去左SUPERMARKET買材料！！
然後就返屋企準備今晚既晚餐。。

香蒜腸仔炒意粉
材料:
蒜頭五粒　切成蒜蓉
廚師腸四條　切片
意粉 (二人份量)

跟RUBI都有點雞手鴨腳。。。不竟都係第一次！！
先把蒜頭切成蒜蓉再將腸仔切片備用。。。
煲滾水後落啲鹽同油及少量雞粉再放入意粉 (按照包裝上的時間煮熟約8-9分鐘)
燒熱鑊落油爆一爆香啲蒜蓉至金黃色。。。
再將倒入腸仔一起炒。。。
然後就放入意粉炒炒炒。。。加啲蒜鹽加啲黑椒。。。
如果覺得乾左啲也可以倒少少烚意粉時既水再炒一炒！
大功告成喇！！真係香噴噴呀！！
看見我地合作既製成品真係覺得好滿足呀！！
再加啲煙肉碎粒。。。真係冇得頂呀！！
味道都不錯！真係覺得好開心呀！！

然後再來一個日式芝麻醬豆腐
哩個真係好方便！！
買了百福蒸煮豆腐再加上芝麻醬就食得！！
常簡單！
 
食飽飽
終於等到9:40。。。DHL終於都出現了！！
好野。。。有新電腦玩喇！

餃子菠菜面

今晚都係由HusB主持大局！
昨日在SUPERMARKET買了灣仔碼頭水餃及在街市買了娃娃菜！
最好就係可以用來煮面食！
HusB趁我到了胡醫生針灸既時間去面店買了菠菜面！
回家都洗好晒啲菜仲同菠菜面過完冷河等我回來煮食。。。
今餐真係非常簡單。。。
烚完菜落餃子再煮面！

簡簡單單又一餐！
而且仲好健康添！

STEAK

今晚決定要煎牛扒！
邀請埋RUBI來一起品嚐呀！
放工後去街市買左薯仔。。。哩個係RUBI既最愛！
然後回家先將它清洗乾淨！
煲滾水放薯仔落去烚。。。
20分鐘熄火。。。由它在煲內自生自滅！
而我就落樓到SUPERMARKET找HusB買牛扒！

今次係我地第一次煎扒。。。
的確唔係好識點處理。。。
買了美國西冷及肉眼同埋加拿大肉眼。。。
再買埋調味料就回家準備喇！
等埋RUBI放工上來就開始我地既晚餐喇！
在煲內自生自滅既薯仔都焗林了。。。正！
全完利用晒外出既時間去整好啲薯仔！
咁就可以滾菜！白烚娃娃菜！
整完哩兩味後就到HusB出場時間喇。。。
由他去處理哩三塊牛扒！
 
第一次煎扒有哩個效果都認真唔錯架喇！
相信下一次應該會煎得更好既！
好好味呀！

上海面

婚後兩個星期才開始 >>> 第一煮
煮飯對於我地兩個來說可以話係一件陌生既事！
皆因廚房哩個神聖地方。。。絕對唔係我地兩個經常朝聖既地方！

婚後依然未病癒仲要睇醫生
西醫唔得要睇埋中醫。。。
所以放工就去找胡醫生針一針順便小睡休息一下。。。
今晚約好左PCCW既師傅來裝英超。。。8-11時段！
都唔知會幾時上來。。。只有等待！

HusB放工後去左買餸！
今晚有菜芯／雜丸（魚旦／墨丸／蝦卷／魚片頭／牛丸。。。）／上海面！
放工時段街市有減價速銷。。。
五蚊兜菜芯！都有成十多條！好抵買呀！（最重要係新鮮唔係爛既！）
丸類就比較貴。。。
因為係買新鮮唔係急凍！

我地第一次一起下廚。。。
因為咩都唔識。。。所以都係有點雞手鴨腳！
先煮起上海面備用！
然後就淥菜芯。。。
聽說好似要落油！但重手地落多左！
感覺好油呀！
然後再落丸煮到浮起。。。再放返上海面落去煮一煮！
攪掂既同時。。。
PCCW師傅到要裝電視！
又會咁橋開飯先來！
HusB去處理而我就當然係試食～

點解咁怪既？
好重面粉味。。。係唔係未熟呢？
點解跟屋企煮既上海面唔同既？？
忍唔住跟HusB說好難食。。。嚇親他了。。。
但他試食完覺得沒有問題！還說係咁樣架啵！
跟他在家中食的是一樣。。。
真奇怪！
可能我地兩個家中所煮既上海面方法不同而導致我說了這個不好的形容詞。。。
不過始終都係沒有一個好湯底所以冇有味道很清淡。。。
我地要再加油！好好學習下煮飯先！